Tre suplementet që ndihmojnë studentët në fillim të vitit akademik

Me fillimin e vjeshtës dhe nisjen e vitit të ri akademik, shumë studentë përballen me periudhën më intensive të vitit. Orë të gjata studimi, ndryshim orari, mungesë gjumi dhe ushqyerje e çrregullt ndikojnë drejtpërdrejt në shëndetin fizik dhe mendor.
Në këtë periudhë, trupi kërkon më shumë energji dhe mbështetje ushqyese, ndaj përdorimi i disa suplementeve bazë mund të jetë i dobishëm për të ruajtur ekuilibrin.
Më poshtë janë tre suplementet kryesore që këshillohet t’i marrë çdo student në fillim të vjeshtës, të mbështetura nga studime shkencore dhe përvoja praktike.
1. Omega-3 – ndihmon përqendrimin dhe kujtesën,Omega-3 është një ndër suplementet më të studiuara për efektet e saj pozitive në funksionin e trurit.
Ajo përmirëson kujtesën, përqendrimin dhe ndihmon në uljen e stresit mendor.
Për studentët që kalojnë orë të tëra përpara kompjuterit ose librave, Omega-3 ndihmon në ruajtjen e përqendrimit dhe qetësisë gjatë periudhave me ngarkesë të lartë.
Burimet natyrale janë peshku i yndyrshëm (si salmoni, sardelet dhe toni), por në mungesë të tyre, mund të përdoret në formë kapsulash.
2. Vitamina D – e nevojshme gjatë stinës së ftohtë
Me pakësimin e orëve me diell në vjeshtë dhe dimër, trupi fillon të prodhojë më pak vitaminë D, e cila është thelbësore për funksionimin e sistemit imunitar, shëndetin e kockave dhe ruajtjen e energjisë.
Studentët që kalojnë shumë kohë në ambiente të mbyllura, si klasa apo biblioteka, janë më të prirë ndaj mungesës së saj.
Një dozë ditore e vitaminës D, në formë pikash ose tabletash, është një mënyrë e thjeshtë për ta kompensuar këtë mungesë dhe për të shmangur lodhjen kronike apo uljen e imunitetit.
3. Magnez – për reduktimin e stresit dhe lodhjes
Stresi dhe mungesa e gjumit janë ndër problemet më të zakonshme për studentët universitarë.
Magnezi ndihmon në relaksimin e sistemit nervor, në uljen e tensionit të muskujve dhe në përmirësimin e cilësisë së gjumit.
Ai gjithashtu luan rol të rëndësishëm në prodhimin e energjisë dhe në ruajtjen e ekuilibrit elektrolitik të trupit.
Mund të merret përmes ushqimeve si drithërat integrale, arrat dhe perimet jeshile, ose në formë suplementi.

Preng Macaj